Feestyd = Rustyd

Gister namiddag gaan tel ek ons kinders by Jaco en Sarah op. Hulle het ‘n bietjie daar gespeel terwyl ek vinnig probeer inpak vir vandag se vertrek na Hermanus vir ons Coetzee Kersfees. Jaco en Sarah sit en speel kaart met glase witwyn – min wyn met baie ys. Die kinders is besig om ‘n danspartytjie te hou in opdress klere. Die prentjie lyk feestelik. Die Else het in rus ingegaan vir die feestyd.

Ek onthou die feesseisoen as kind. Soggens is alle nodige take verrig. Na ‘n middagslapie voor waaiers het die hele gesin in die klipdam gaan swem om af te koel. Ek onthou nog die slymerige bodem van die dam, die duisende waterhondjies (soort vreemde swemmende gogga) en die sout sout boorgatwater in die dam. Ons mag nooit my ma se hare nat gespat het nie.

Na die swem was dit koffie op die stoep, koffie en van my ma se tuisgebakte vrugtekoek. Dan het ons sommer lank so sit en kuier op die stoep voordat elkeen weer sy gang gegaan het. Desembermaand was GOEIE rustyd.

My kop weet my lyf moet rus, nietemin het ek weer hierdie week van daardie angsaanvalle gehad oor die toestand van ons huis. Adriaan arriveer middel Februarie, maar tog was ek nog nooit so onvoorbereid vir ‘n baba nie. Daniël se kamer voel soos ‘n nes. My versamelkind kan niks wegsmyt nie. As ek saam met hom sy kamer wil orden, loop dit uit op oorlog. Selfs die boksies en papiertjies van speelgoed wat ons koop moet bewaar word.

Ek sien die heeltyd iets wat ek eers wil skoonmaak voordat ek op die bank sal ontspan met ‘n boek. Die lysies in my dagboek is nimmereindigend.

Sondag bring Christiaan die mooiste boodskap oor rus. Wat bedoel God met rus? (God se rus lyk anders as die wêreld se rus. In die wêreld bepaal werk jou wins. In die koninkryk bepaal rus jou resultate in terme van jou vrugte.)  Gister luister ek nog ‘n handvol kort clips van Bill Johnson oor rus. Rus is nie iets wat ons net in Desember moet doen nie. Ons moet in rus bly by God se voete. Dis in rus waar ons God se stem. Ons hoor nóóit sy stem terwyl ons hardloop en jaag en lysies tiek nie. Dis nie hoe dit werk nie.

Gisteraand maak ons ‘n krismisbed voor die televisie. Ons maak pizza, die kinders help kerf en rasper. Ons eet voor Home alone 1. Die kinders geniet die aand ongelooflik baie. Ons ook. Dit voel soos die feesstyd. Ek gaan slaap sonder om die kombuis op te ruim. Ons eet sjokolade in die bed voor ons gesin in een groot bed aan die slaap raak.

Vanoggend gaan ry Lambrecht en die kinders ‘n vinnige draai. Ek speel kliphard lofprysingsmusiek en sing sommer uitbundige saam. Die Here se rus is vir almal. Dis soos Sy genade. Ons moet net dankie sê en dit geniet.

Mag jy en jou gesin hierdie feestyd regtig God se wonderlike rus proe.

Jes. 30:15

As julle julle bekeer en tot rus kom,

Sal julle gered word.

Julle krag lê in stil wees en vertroue hê.