Jou X

Vanoggend glip ek gou by ‘n winkeltjie hier in Wellington in vir brood en melk. “Julle is seker Woensdag toe om te gaan stem?,” vra ek so half terloops. Die vrou agter die till verduidelik dat hulle moet beurte maak om te gaan stem, want die winkel moet oop bly. “Weet jy hoe moeilik gaan dit wees om taxi’s te kry. Weet jy hoe lyk die rye in die townships waar ek moet stem?” vra die vrou.

Dis waarom sy liewer nie gaan stem nie. Buitendien maak almal nou die mooiste beloftes waarvan daar niks gaan kom nie.

Ek vra haar of sy kinders het en sy vertel trots van haar drie kinders. “Dis waarom jy moet gaan stem. Ons doen dit vir ons kinders. Ons wil hê die gety moet draai en daar moet ‘n blink toekoms wink vir ons kinders hier in Suid-Afrika,” probeer ek haar vir oulaas oortuig voordat ek uitstap.

Sy glimlag net. Ek hoop sy gaan tog maar Woensdag stem.

Alhoewel ek net ‘n huismamma is wat weinig weet of verstaan van politiek, voel ek vreemd optimisties. Ek bid saans om 21:00 saam met duisende ander Suid-Afrikaners vir die verkiesing. Ons bid vir wysheid vir elkeen wat hul kruisie gaan trek, ons bid vir eerlike leiers, ons bid vir ‘n vreedsame verkiesing. Ons bid vir die Here se wil met hierdie verkiesing.

“En wat as almal bid en optimisties is en dinge loop steeds skeef met hierdie verkiesing,” wil manlief nou die aand skepties weet.

Dan vertrou ons dat ons saadjies gesaai het in die grond en dat dit met ‘n volgende verkiesing sal vrug dra. Ons tyd is nie die Here se tyd nie.

Verkiesings is oorweldigend. Steve Hofmeyr moedig ons mooi aan op RSG om eerder te droom van ‘n mooi toekoms as om stil te staan by die verlede. Mmusi Maimane vra in die mooiste Afrikaans dat ons DA sal stem. Cyril nooi met ‘n vriendelike gesig om ANC te stem. Die tafel is gedek. Ons kan kies en keur.

Mag elkeen Woensdag gaan stem. As jy die voorreg het om ‘n eienaar van ‘n besigheid te wees – moedig jou mense aan om te stem. Maak dit vir hulle maklik om te stem. Mag Woensdag hoofstuk 1 wees van ‘n nuwe seisoen vir ons land. Mag dit die begin wees van ‘n reënboogkleurige toekoms vir ons kinders.

Ek stem, want ek glo in ons mooi land Suid-Afrika. Vir my, vir Lambrecht en vir die drie klein Coetzeetjies.