Life
is painting a picture, not doing a sum.
-
Oliver Wendell Holmes Jr-
Gisteraand gooi ons alle laastes uit ons vrieskas op die
rooster. Dit strek nou van varkworsies tot hoenderboudjies. Van die laaste
verdwaalde volgraan pitabroodjies het ek sommer braaibroodjies gemaak met kaas
en uie. Ek maak ‘n uitbundige slaai met baie olywe, fetakaas en sondroog
tamaties – net om als op te gebruik.
Ons moes gisteraand braai, want ons het nog ‘n halfsak “charcoal”
oorgehad van ons vorige braaitjie. Ek sou dit weggooi of weggee. My man was
beslis. Daar’s baie goed wat mens kan weggee…”charcoal” is nie een van daai
goed nie. Dis vir eie gebruik.
Die aand is bo verwagting pragtig. Die reën
het vir ‘n oomblik gelig. Dis ‘n wonderwerk. Orals oor die nuus hoor ons immers
dat hierdie Aprilmaand die natste in ‘n dekade was. Ek het ons gunsteling
peerbier gekoop vir ons afskeidsbraaitjie.
En so word ons onverwagse braaitjie ‘n feestelike aandjie
alleen by die huis. Ons droom van ‘n eie huis en eie besigheid terwyl ons smul
aan ‘n paar verdwaalde bacon kips wat ons sommer in maaskaas doop vir ‘n
doopsous. Ons balanseer ons vleisbak op ons asdrom omdat ons tafeltjie reeds
weggepak is. Terwyl Lambrecht die laaste hoenderboudjies afhaal, glip ek gou
kombuis toe om ‘n mooi tafel te dek. Ek druk die kerse wat ek nog by ma Elize gekry het in die blombak in ons vensterbank.
Ek gebruik my laaste gunsteling pienk- en- blou blomservette.
Dan sit ons aan by ons feesmaal. Lambrecht sit net eers gou
vir Bryan Adams sag op die agtergrond vir die regte atmosfeer by die kerslig. “Dit
voel amper soos uiteet,” merk Lambrecht so ewe op terwyl hy weglê
aan die gemarineerde hoender (Ek het oorskiet marinade ontdek) en unieke “braaibroodjies.”
En ewe skielik maak dit vir my sin. Die lewe is nie ‘n som
wat bereken wil word nie. Die lewe is ‘n prentjie wat geteken wil word. Die kleure op ons palet is soms nie
wat ons wil hê nie, maar dis altyd genoeg om aan te hou teken. En dis
veronderstel om vir ons lekker te wees. As die lewe nie meer lekker is nie, is
jy besig om somme te maak – en dis nie wat God vir ons bestem het nie.
Hy’s die groot sommaker.
Ons hoef net te teken.
En elke oomblik daarvan te geniet, want wat jy vandag, op hierdie oomblik
beleef is uniek. Jy gaan dit nooit weer in jou lewe ervaar nie. Elke sekonde
wat verbygaan is ‘n unieke sekonde wat nooit weer sal wees nie.
Comments
Post a Comment