Faith grows in the
shadow of darkness.
Diè eenvoudige sinnetjie haal Danny, my nuwe baas, Maandag
tydens ‘n vergadering aan. Dit kom sit vas iewers tussen hart en verstand en
werk heelweek met my gestel.
Geloof is ‘n anderster ding.
Omdat Noag geglo het, was hy bereid om ‘n skip op droë
grond te bou. Die Here hèt mos gesê die stormwaters sal kom.Omdat Abraham
bly glo het, al was Sara oud en onvrugbaar, het die Here hulle hulle geseën
met ‘n babatjie. Omdat Moses geglo het, is hy die woestyn in met ‘n klomp
Israeliete, oppad na die beloofde land. Omdat Dawid geglo het, het hy kans
gesien vir Goliat. Omdat Josef bly glo het, het God hom in ereplek in Egipte
gegee. Die storie van die bybel bestaan uit…omdat mense geglo het.
En ek is seker Dawid het miskien ook vir ‘n oomblik met die
klippie in sy hand gedink: “O hel.” Of Noag terwyl hy timmer aan ‘n reusagtige
skip op droë
grond: “Ek hoop ek het reg gehoor.” Of Moses deur die woestyn: “Nou mis ek
darem die vleispotte van Egipte.” Tog het nie een van hulle teruggedraai nie.
Die Here het elke keer hulle verwagtinge oortref.
Ek staan telkemale verstom voor die gelooftoets. Die Here
het my nog nooit teleurgestel as ek met my klippie voor Goliat staan nie. En
dis nou weer so.
Ek begin ongeveer 2 weke gelede by ‘n pragtige koffieplekkie
in die Paarl. Die plekkie het so baie potensiaal met sy breë
stoep, gesellige kaggel, ou houtvloere en hoë plafon. Die voete deur die
plekkie is net te min. Sy keel is besig om toe te wurg. Ek moet kom kyk of ons
nuwe lewe kan inblaas.
Ek weet dis waar die Here my nou wil gebruik. Ek weet egter
nie daardie Maandagmôre waar mens begin nie. Twee weke later ken ek die
antwoord. Mens begin al oppad werktoe in jou motor. Ek bid dat Gamu en Jolanda
die mense vriendelik en flink sal bedien. Ek bid dat Jessie die vloere sal
blinkvryf en die kombuis en badkamers so netjies sal hou dat ons daarop trots
kan wees. Ek bid dat Barbara sal besef hoe belangrik haar taak as chef is. En
dan bid ek selfs vir oupa. Ek bid dat hy die akkertjies met nuwe vuur sal
omspit en versorg.
Die Here luister na desperate gebed. Altyd. Hy weet wanneer
Hy jou plan A en jou plan B is. Hy weet wanneer jy met jou klippie staan en gló
jy gaan die reus tref.
Vandag was ons besigste dag tot nog toe in Monte Christo. Ek
kan nie anders as om die Here te loof en te prys vir sy goedheid nie.
Comments
Post a Comment